Դորտմունդի «Բորուսիայի» հարձակվող Յուսուֆա Մուկոկոյի գործակալ Պատրիկ Ուիլյամսը քննադատել է ակումբին՝ խաղացողի նկատմամբ վերաբերմունքի համար։
«Յուսուֆան հսկայական ներուժ ունի, որը, ցավոք, նա չկարողացավ ցուցադրել նախորդ մրցաշրջանում: Կարծում եմ, որ նրա որակի մասին շատ բան է ասում այն փաստը, որ նա 613 րոպեում 5 գոլ խփեց։ Բունդեսլիգայում քիչ խաղացողներ ունեն նման ռեկորդ:
Մինչ պայմանագիրը ստորագրելը Յուսուֆային շատ բան են խոստացել, սակայն չեն կատարել։ Նրան միշտ հետաքրքրում էր միայն խաղը և իր զարգացումը, այլ ոչ թե որևէ այլ բան, ինչպես միշտ նշվում էր լրատվամիջոցներում։ Եթե խոսքը փողի մասին լիներ, նա կարող էր ընդունել այլ առաջարկներ ու 3 անգամ ավելի շատ վաստակել։
Գաղտնիք չէ, որ կան բավականաչափ ակումբներ, որոնք հավատում են Յուսուֆայի հմտություններին և ցանկանում են նրան տեսնել իրենց թիմում: Բայց այդքան քիչ խաղաժամանակի դեպքում բոլորը կիմանան, որ Յուսուֆայի շուկայական արժեքը ցածր կլինի, դորտմունդցիները չեն կարողանա մեծ գումարի վրա հույս դնել:
Մենք ուզում էինք, որ ամեն ինչ այլ կերպ լիներ, բայց դա նրանց գործն է: Յուսուֆան բացարձակապես պարզ է իր մտքերում, չափազանց կենտրոնացած է և գիտի, թե ինչ է ուզում: Այժմ մեզ նկատմամբ հետաքրքրություն են ցուցաբերում Անգլիայում, Իսպանիայում եւ Ֆրանսիայում»,- գործակալի խոսքերն է մեջբերում լրագրող Ֆաբրիցիո Ռոմանոն։
