Իսպանիայի հավաքականի գլխավոր մարզիչ Լուիս դե լա Ֆուենտեն ամփոփել է թիմի առաջխաղացումը EURO-2024-ի կիսաեզրափակիչ։ Քառորդ եզրափակիչ փուլում իսպանացիները լրացուցիչ ժամանակում հաղթեցին Գերմանիային (2։1)։
«Սա պատմական երեկո է։ Ես հպարտ եմ, որ ներկայացնում եմ մեր երկիրը։ Թե որքան հեռու կգնանք, կտեսնենք, բայց մենք բացարձակապես համոզված ենք, որ այս թիմով կարող ենք շատ առաջ գնալ։
Ես հպարտ եմ, որ մարզում եմ այս ֆուտբոլիստներին։ Նրանցից շատերին ես ճանաչում եմ երկար տարիներ։ Նրանք սովոր են ամենաբարձր մակարդակով հանդես գալուն և հնարավորություն ունեն հաղթելու մրցաշարում։
Այս թիմը միշտ մրցելու է։ Իհարկե, միշտ էլ կատարելագործվելու տեղ կա, բայց մենք չենք կարող կասկածի տակ առնել նրանց հպարտությունը, մակարդակը և նվիրվածությունը։
Մեր էյֆորիան լիովին վերահսկվում է։ Մենք այնքան երջանիկ ենք, բայց գիտենք, որ վաղը այլ օր է լինելու։ Մենք չենք կարող վերահսկել այն, ինչ տեղի է ունենում խաղադաշտից դուրս, բայց շատ ուրախ ենք, որ երկիրն աջակցում է մեզ»,- մարզչի խոսքերն է մեջբերում ՈւԵՖԱ-ի մամուլի ծառայությունը։
