Ֆրանսիայի հավաքականի հարձակվող Անտուան Գրիզմանը կիսվել է Գերմանիայում մեկնարկող Եվրոպայի առաջնությունից իր սպասելիքներով:
«Ինձ համար ուժեղ պաշտպանությունը հաջող մրցաշարի գրավականն է: Եթե յուրաքանչյուր խաղացող օգնի պաշտպանությանը, մենք շատ հեռու կգնանք։ Առջևում ունենք նաև շատ խաղացողներ, ովքեր կարող են խնդիրներ առաջացնել մրցակցի համար, ովքեր կարող են ցանկացած րոպե գոլ խփել։
Ինձ դուր է գալիս տակտիկական աշխատանքը, այն նվազագույնի է հասցնում մեր մրցակիցների հնարավորությունները։ Ես միշտ փորձում եմ համոզել իմ խաղընկերներին չափազանց լուրջ վերաբերվել դրան և աշխատել պաշտպանության վրա։ Դա շատ պարզ է թվում, բայց միևնույն ժամանակ չափազանց դժվար է հատկապես հարձակվողների համար։ Ինձ համար սա ամենակարեւոր կետն է, որը հաջողության գրավականն է։
Կարծում եմ՝ մի քանի ֆավորիտներ կան։ Գերմանիան է, որը խաղում է տանը։ Հետո Նիդեռլանդներն են, Խորվաթիան, Իտալիան, Իսպանիան, Անգլիան… Շատ ուժեղ թիմեր կան։ Այս առաջնությունն իսկապես լարված է լինելու։ Մեր խաղը մեզնից է կախված, պետք է խաղադաշտում ապացուցենք, որ ֆավորիտների թվում ենք, իսկ մնացածը բախտից է կախված։ Մենք գիտենք, որ եզրափակիչը հուլիսի 14-ին՝ Բաստիլի գրավման օրն է։ Ամեն ինչ կախված է մեզանից։ Մենք պետք է փորձենք դա անել՝ խաղալ եզրափակչում և գավաթը տուն բերել»,- Գրիզմանի խոսքերն է մեջբերում ՈւԵՖԱ-ի մամուլի ծառայությունը։
Ֆրանսիայի հավաքականը հայտնվել է D խմբում Լեհաստանի, Հոլանդիայի և Ավստրիայի հետ միասին։
