«Միլանի» գլխավոր մարզիչ Ստեֆանո Պիոլին ամփոփել է Իտալիայի առաջնության 11-րդ տուրի՝ «Ուդինեզեի» դեմ հանդիպումը (0-1):
«Մենք չխաղացինք այնպես, ինչպես կարող էինք և ուզում էինք: Ինչքան առաջ էինք շտապում, այնքան ավելի քիչ կարգ ու որակ կար մեր խաղում։ Նույնիսկ այն շաբաթներին, երբ մենք լավ արդյունք չէինք ստանում, լավ էինք խաղում։
Բայց այսօր՝ ոչ, մենք չափազանց քաոսային գործեցինք։ Արդյունքներն ու կատարումը պետք է անհանգստության պատճառ լինեն: Մենք գիտեինք, որ դա կարող է դժվար լինել, քանի որ «Ուդինեզեն» թույլ չի տալիս մեզ գտնել մեր ռիթմը:
Բայց ընդհանուր առմամբ խաղը չհամապատասխանեց մեր չափանիշներին: Դրանում մենք պետք է մոտիվացիա գտնենք առաջ շարժվելու և շատ իրավիճակներում ավելի լավ հանդես գալու համար:
Մենք պետք է շատ ավելի լավ խաղանք, և երկրպագուների դժգոհությունն արդարացի է, հատկապես ինձ համար, քանի որ թիմը չխաղաց այնպես, ինչպես մենք էինք ցանկանում»,- Պիոլիի խոսքերն է մեջբերում Sky Sport Italia-ն։
Նշենք, որ «Միլանը» 22 միավորով երրորդն է Ա Սերիայի մրցաշարային աղյուսակում, «Ուդինեզեն» 10 միավորով 16-րդ տեղում է:
