Մադրիդի «Ատլետիկոյի» իսպանացի հարձակվող Ալվարո Մորատան շատ ակումբների հետաքրքրության շրջանակում է։ Նրանցից մեկը՝ սաուդյան «Ալ-Հիլալը», 30-ամյա հարձակվողին առաջարկել է տարեկան 50 միլիոն եվրոյի պայմանագիր, հայտնում է Mundo Deportivo-ն:

Աղբյուրի համաձայն՝ սաուդյան ակումբը պատրաստվում է իսպանացի հարձակվողին գայթակղել նման հսկայական առաջարկով, սակայն Եվրոպայից տարբերակները մնում են առաջնահերթություն հենց Մորատայի համար: Իսպանացի հարձակվողով հետաքրքրված են Ա Սերիայի երեք ակումբներ՝ «Յուվենտուսը», «Միլանը» և «Ռոման»։ Ֆուտբոլիստ ձեռք բերելու ամենամեծ փորձերը անում է միլանյան ակումբը, որն արդեն հասցրել է ֆուտբոլիստին առաջարկել չորս տարվա պայմանագիր՝ տարեկան 5 միլիոն եվրո աշխատավարձով։

2022/2023 մրցաշրջանում Մորատան «Ատլետիկոյի» կազմում անցկացրել է 45 հանդիպում բոլոր մրցաշարերում, որոնցում դարձել է 15 գոլի և 3 գոլային փոխանցման հեղինակ։