Հոլանդիայի հավաքականի նախկին հարձակվող Ռուդ վան Նիստելռոյը նշանակվել է ՊՍՎ-ի գլխավոր մարզիչ։ Համաձայնագիրը նախատեսված է մինչև 2025 թվականը և ուժի մեջ կմտնի հաջորդ մրցաշրջանի սկզբից, հայտնում է ակումբի պաշտոնական կայքը։

ՊՍՎ-ի ներկայիս գլխավոր մարզիչ Ռոջեր Շմիդտը կլքի զբաղեցրած պաշտոնը 2021/22 մրցաշրջանի ավարտից հետո։ Այժմ թիմը Հոլանդիայի առաջնության մրցաշարային աղյուսակի 2-րդ տեղում է՝ 27 խաղում վաստակած 64 միավորով։

ՊՍՎ-ի նախկին հարձակվողն ակումբի համակարգում է 2016 թվականից։ Այդ ընթացքում նա հասցրել է մարզել ակումբի պատանեկան ու երիտասարդական թիմեր։ Վան Նիստելռոյը փորձ ունի նաև Հոլանդիայի հավաքականում, որտեղ նա աշխատել է որպես գլխավոր մարզչի օգնական։