«Նյուքասլի» հարձակվող Ալեքսանդր Իսակին գնել ցանկացողները ստիպված կլինեն վճարել հսկայական գումար։ Լոնդոնի «Արսենալը» վաղուց է շվեդների հավակնորդների թվում, և «կաչաղակների» առաջատարը կարող է դառնալ նաև «Լիվերպուլի» տրանսֆերային թիրախը, եթե Մուհամեդ Սալահը հեռանա:
Ինչպես հաղորդում է Telegraph Football-ը, «Նյուքասլը» Իսակի համար կպահանջի 150 միլիոն ֆունտ ստերլինգ (ավելի քան 180 միլիոն եվրո): Դժվար թե որեւէ մեկը պատրաստ լինի նման գումար վճարել՝ չնայած 25-ամյա հարձակվողի տպավորիչ խաղին։
Ալեքսանդր Իսակը Պրեմիեր լիգայի ընթացիկ առաջնությունում անցկացրած 16 հանդիպումներում 11 անգամ գրավել է մրցակիցների դարպասը, ինչպես նաև 4 գոլային փոխանցում կատարել թիմակիցներին։
