Դորտմունդի «Բորուսիայի» գլխավոր մարզիչ Էդին Թերզիչը կիսվել է Գերմանիայի առաջնության 5-րդ տուրի՝ «Հոֆենհայմի» հետ խաղում (1:0) տարած հաղթանակից իր տպավորություններով:

«Շատ լավ խաղ ցուցադրեցինք հատկապես առաջին խաղակեսում։ Մենք գիտեինք, որ «Հոֆենհայմն» ուժեղ է մենապայքարներում, ուստի ցանկանում էինք նրանցից առաջ անցնել՝ ընտրելով ճիշտ դիրքը։ Դա օգնեց ստանալ ազատ տարածք: Մենք շատ վտանգավոր պահեր ստեղծեցինք և թույլ չտվեցինք մրցակցին մոտենալ մեր դարպասին, ինչը շատ հաճելի է։

Երկրորդ խաղակեսում մենք հաճախ էինք կորցնում գնդակը։ Խաղավարտին մոտ լրջությամբ ու պրոֆեսիոնալիզմով մոտեցանք պաշտպանական խաղին ու գլուխ հանեցինք ստեղծված իրավիճակից։ Սա ճիշտ ուղղությամբ քայլ է՝ համեմատած այն ամենի հետ, ինչ տեղի ունեցավ մի քանի շաբաթ առաջ, երբ մենք պարտվեցինք «Վերդերին» (2:3)»,- Թերզիչի խոսքերն է մեջբերում «Բորուսիայի» մամուլի ծառայությունը։